საერთაშორისო საგანმანათლებლო თანამშრომლობის ფარგლებში ჩვენი სკოლა ჩაერთვება eTwinning-ის პლატფორმაზე განხორციელებულ პროექტში „Growing the Future: From Bean to a Sustainable Planet“, რომლის თანაავტორიც გახლავთ ჩვენი სკოლის პედაგოგი რუსუდან გორგაძე. პროექტში მონაწილეობას მიიღებენ ქ. თბილისის №167 საჯარო სკოლის IIIგ კლასის მოსწავლეები და მათი თანატოლები თურქეთისა და პოლონეთის სკოლებიდან, რაც მოსწავლეებს მისცემს შესაძლებლობას ჩაერთონ საერთაშორისო საგანმანათლებლო თანამშრომლობაში და ერთობლივად იმუშაონ გარემოსდაცვითი და მდგრადი განვითარების საკითხებზე.
პროექტი თებერვლიდან მაისამდე განხორციელდება და მისი მიზანი იქნება მოსწავლეებში გარემოსდაცვითი ცნობიერების, მდგრადი განვითარების იდეებისა და აქტიური მოქალაქეობის უნარების განვითარება ინტერდისციპლინარული სწავლების გზით. პროექტის ფარგლებში ინტეგრირებულად გამოყენებული იქნება საბუნებისმეტყველო მეცნიერებები, მათემატიკა, წიგნიერება, ციფრული კომპეტენცია და მოქალაქეობრივი განათლება.
პროექტის პროცესში მოსწავლეები ერთმანეთს ციფრული პრეზენტაციების მეშვეობით გაეცნობიან, იმუშავებენ საერთაშორისო გუნდებში, შექმნიან პროექტის ლოგოს, ჩაატარებენ გარემოსდაცვით კვლევებს და განახორციელებენ პრაქტიკულ აქტივობებს, მათ შორის ლობიოს დარგვასა და მცენარის ზრდის დაკვირვებას. ასევე გააანალიზებენ პლასტმასის გამოყენებას ყოველდღიურ ცხოვრებაში, გაეცნობიან კომპოსტირების პროცესს და მონაწილეობას მიიღებენ გარემოს დაცვის სფეროს ექსპერტებთან ონლაინ შეხვედრებში.
პროექტის ფარგლებში მოსწავლეები ერთობლივად შექმნიან სხვადასხვა საგანმანათლებლო პროდუქტს, მათ შორის ციფრულ რესურსებს, მონაცემთა ვიზუალიზაციებსა და ერთობლივ ელექტრონულ გამოცემებს. პროექტის შედეგები გავრცელდება სკოლისა და პროექტის ციფრული პლატფორმების მეშვეობით.
აღნიშნული ინიციატივა ხელს შეუწყობს მოსწავლეებში კვლევითი, ანალიტიკური, ციფრული და მოქალაქეობრივი უნარების განვითარებას და მათ ჩამოყალიბებას გარემოზე პასუხისმგებელ მოქალაქეებად.
